Pa Teresina González

Tráyote’l cabás Teresa,
cola moñeca de trapu,
cuantayá, frañera encesa,
que-yos devolviera’l Papu.

El mio versu, si te peta,
escribayáu en ringleres.
Una preba, d’escoyeta,
del maxín a sos deleres.

Alcordances del collaciu
de guedeyes de panoya
que mudó a mayor, con xaciu,
sin escaecer la troya.

El mandilón de cuadrinos,
d’un caxón de la memoria.
Chuchos de los rapacinos,
los qu’enredaben na noria.

Les cintines de colores,
sin desendolcar los llazos.
El mio envís de que nun llores
y de la to xente, abrazos.

Regolvinos de la fonte,
de la corra, unes castañes.
Una semeya la ponte
que cruciabes en Tremañes.

Al cuartu escuru de suaños
quiero la so lluz iguar;
d’esta miente tolos años,
abondo podrás xugar.


Pindesierra