Nada, nada nun había,
nin s’amuesa la color,
como pa que te sorría
el neñu pente’l mugor.
Abondo que pa comer
entraba’l dineru en casa,
nun lu soi a escaecer,
magar que la vida pasa.
Remanecen alcordances
y namái qu’un par de fotos,
unos llograron avances,
otros, los calzones rotos.
Unos, milenta semeyes,
otros, poques ya engurriaes,
caleyabes a cencielles
pente les autoridaes.
A cencielles, cola nada,
cola nada que dexaron,
enredabes cola estrada,
que lo demás lo llevaron.
Xugabes ensin trebeyos
per cais entafarraes,
que tolo ganaron ellos,
los mios daben les callaes.
Foi prindao al enemigu,
ansí lloraba la fueya;
vos arreniego y maldigo
por desaposiar a ella.
Que más semeyes quería,
sobre too de los fíos,
pero nada más había
que murnia, tristura y fríos.
No hay comentarios:
Publicar un comentario