Tanto tienes,
tanto vales,
canta onde te detienes,
la coleición de postales
¿Ye presente?
non, pasáu,
magar caltiénse llatente,
neses estampes, posáu.
L’alcordanza
te tresllada
a aquel tiempu, n’alloñanza,
n'otra vida yá pasada.
Hai dalgunes
que te fienden,
espeten como les brunes,
mientres que los años llenden.
Familiares
que colaron,
dellos montes y llugares,
mocines que nos amaron.
Con respetu,
ta perclaru,
porque al amor poníen vetu
y el pecáu salía mui caru.
Nun requexu
s’acoriquen
recuerdos, papel encesu,
que t’allegren o enfociquen.
Güei ñublará
los de Xelu,
l’andanciu lu soterrara,
cunten que xubió pal cielu.
Tanto tienes,
tanto vales,
histories que nun son bienes,
son coleición de postales.
No hay comentarios:
Publicar un comentario