Morrió Gigi

     Na nuesa casa nun queremos tener animales porque se nos abulta qu'a un animal hai que lu atender como se debe y porque contamos que deben de vivir en llibertá. Sicasí, y nel casu concretu de los perros, confieso que pasiamos a los de la vecina. Voi desplicame: por culpa de qu'esta señora casi nunca saca de paséu a los sos canes, nós emprestámonos a faelo, yá qu’arriendes qu’ella ye amiga, tamién lo son los sos perros. Poro, non yá pasiamos al circunstancial sabuesu, queremos-y y lloramos la so muerte cuando se produz, magar que yá acompañáremos de delles xeneraciones de perros. Amás, puedo afitar qu'esti ciñu ye recíprocu. Gigi ye'l más favorecíu de los actuales y albidra aína al mio fíu de la que s’avera a la so casa pa recoyelu. Obedez lu que-y manda’l so guía y nun avanza si él nun lo fai. Ye más, si s'adelantra, recula nel intre fasta'l so llau. En bien d’ocasiones, vuelve la cabeza pa decatase de que'l so indixebrable amigu lu sigue. A la mio muyer y a min, tamién nos fai casu; pero con menos frecuencia. Coles mesmes, nos quier, pero con menos intensidá. Tamién nos mira, pero abondo menos. Somos talamente amigos, pero non tantu.

     Gigi esfruta de la caminada, refugando l'inconformismu d'aquellos que nun esfruten con nada. Gigi bocexa l'aburrición de los que lu cafien. Gigi aguanta los rancios espolinos por sabia conveniencia. Gigi amuésase indiferente, como si yá lu supiera tou, o quiciabes tou lo que-y paez valoratible saber. D'últimes, podría recapitulase que Gigi guarda un debíu protocolu de conveniencia.  

     Cualesquiera podría espetar que nun entiende porque pasiamos a Gigi, yá que nun ye nuesu. Yo-y podría retrucar que porque toos nos beneficiamos de la compañía mutua. Acabaría esclariando que sí tenemos perru, anque nun more nel nuesu terrén. Somos, xuntu cola dueña titular, lo que s'entendería como copropietarios del animal. Ella paga les vacunes y la mayor parte de los alimentos y nós ufiertamos con procuru'l nuesu tiempu llibre y la nuesa desinteresada amistá. Asina, toos tan gayoleros.

     Meses dempués de finar el presente rellato, vime obligáu a amestar esta primera repostia: Gigi se va. Llidia, l’ama, marcha a Canaries col so fíu y los sos dos perros, y ye posible que queden a vivir ellí pa siempres. Quiciabes ayeri diéramos el nuesu últimu paséu con Gigi. Él nun lo sabe y nun lo siente, pero nós yá nos atopamos fondamente murnios, entá na so compañía, porque emprincipiamos a soportar la so ausencia.

     El tiempu que traxo'l posterior treslláu viose somorguiáu en lladríes y llamentos de desacuerdu. La definitiva llanzada llegó güei col alloriáu tornar del mio fíu acarretando la repunante noticia: Gigi dexó d'esistir. Tola nuesa redolada atópase fondamente inxeme. 

Una alloriante vergoña

(Soleya 20 minutos)

     Madrid-Alicante nel AVE en pocu más de lu que tardes en trespandar de Llión a Campumanes, dempués de parar media hora en Llión cola bocona abierta y otra vegada pel altu'l puertu. Mentanto, los furacos de la “Variente” lleven el mesmu camín del escaezu de l'autovía La Espina. Somos toos iguales; sicasí, los otros son munchu más iguales que nós. Una alloriante vergoña.

9º Festival de la L.lana

Desanicia la galbana

ya ven de folixa, neno,

al Festival de la Llana,

que yá vamos pel noveno.

Nun escaezas la cita,

pa esti seis de xunetu,

que la Comisión t'invita,

que pues tornar a petu.

P’aprovechar bien el día,

visita la nuesa feria,

el mercáu d’artesanía

ya una esposición mui seria.

Chuma café de tizón,

seyas foriatu o cazurru,

bei!!a col grupu “Fusión”,

si te peta, monta en burru.

Si te plaz vender de papu,

d’esa mena, vas xantar,

asina que ¿quién ye’l guapu?

que nos lu va refugar.

Como siempres, nuesa oveya,

ya filandera mayor,

te sonrí d’oreya a oreya,

procurando lu meyor.

Ven a Tuña al festival,

de la que crucies la ponte,

col vezu tradicional,

vas ameyorar el pronte.

Tuvi un güelu Neandertal

Tuvi un güelu neandertal

que col hachu daba estopa,

soterrando nel corral,

a la vera de la topa.

Fai más de trenta mil años,

onde’l tiempu yá se pierde,

bebíen agua nos caños

y xintaben muncho verde.

Supiéronlu nel Sidrón,

que yeren vexetarianos,

nun papaben el xamón,

y taben enforma sanos.

L’equipu investigador,

que vieno de Barcelona,

amestáu a otru de York,

afitáronlu na zona.

La nueva, en Europa Press,

foi espublizada fai pocu,

nun carecíen d’estress

y nun-yos cafiaba'l cocu.

Taben más civilizaos

que munchos burros d’agora,

calteníanse delgaos

y bañábense na ñora.

Pos con naide s’amarraben,

los parientes neandertales,

sólo si-yos atacaben,

escalabraben rabales.

EL PALOMBU DEL EXPRÉS

El palombu del Exprés

entra si quier almorzar,

de la que sal, yá dempués,

ponse contentu a esnalar.

Igual que cualquier veceru,

trespanda allegre la puerta,

nunca se pon restoleru

y come tou d’ufierta.

Anda picando pel suelu,

a la vera de les meses,

l’azucre y el carambelu,

o tarreñes de Conteses.

Enxamás toma café,

pos nun lu sirven de papu,

va esquitando cualquier pie,

xinta faraguya o rapu.

Mientres sorbio’l capuchín

él se caltién al mio llau,

yá que tarrez el probín

que-y tríe un enfiláu.

El palombu del Exprés

ye’l palombu más mundial,

si vas pa Grau, lu ves,

xunto al parque principal.

Dolimientu

     Lu que camentara’l mio fíu ye la pura verdá: anque vamos saliendo a flote, siguimos afogando. La nuesa llingua amorrentando pol cafiante desapegu y dalgunos inda rin per ello. La nuesa memoria aforfugando pol desaniciu. Danme pena los que refugaron el so raigañu. Dame pena de los contaos que bastien a la escontra. Aporfia’l dolimientu y rispio por alitar: sicasí, dame pena'l presente’l país somorguiáu pela tristura y, de resultes, compadezo de mio mesmu. 

CRÍA... FÍOS

     Fino de tornar pa casa de caleyar col fíu pa baxar la cena. Foi’l casu que pel camín m’entrugó: ¡ah, pá!, ¿qu’empresa podemos montar? Yo, de secute-y retruqué qu'una editorial y darréu va y m’espeta: sí, ho, pa espublizar los tos llibros n’asturianu y morrer de fame.

LISE

   

  Non, nun torné a Preda a pola pieza acebache que Lise me prometiera. A vegaes nun-y damos a les coses el valir que tienen. Dempués, un repunante día crucióse nel camín y namái me quedó’l so corréu, la so páxina, revolvinos nel banduyu y la so voz na memoria: Voi trayete la pieza acebache...

     Nun se t’escaez, Lise.

Xuan Uría, anéudota

  

     Asocedió una tarde de 1979. Xuan Uría tuviera grabando tol día un discu, nun estudiu de Madrid, cola Capiya Polifónica Ciudá d’Uviéu. Al rematar, l'entós responsable de la Fonográfica Asturiana, Xavel Calzadilla, entrugó-y si taba con xeitu pa grabar unas vaqueiras. Uría Maqua retrucó-y: “Si m’apurren unos bocaos y daqué de vinu...”. De magar que finara, esti paisanu espachó 28 cantares en apenes hora y media d'una vegada.

http://www.facebook.com/Cantaresasturianosuniversales?hc_location=timeline

Vamos valtar l'escaezu

     Van sentinos glayar. Tamos fartos de tantu escaezu. La nuesa música, el nuesu folclor, les nueses costumes qu’enxamás se sintieren pela radio nin se cucaren na televisión carpetuvetóniques yá nun van ser enxamás refugaos. L’UNESCO pué declarar “Patrimoniu de la Humanidá” a lu que-y pete como fixeron colos fados, los mariachis o'l flamencu. Nós vamos dar un pasu más alantre porque nos plaz y porque, amás de ser mundiales, somos universales, declarando “PATRIMONIU de la UNIVERSALIDÁ” a los sones y vezos d’Asturies.

     Xúnite a esta xera, como ta faciendo una montonera xente, en...

     http://www.facebook.com/Cantaresasturianosuniversales?fref=ts

Cafiando los nenos (númberu un pel occidente)

(Con Pindesierra, Paulo Alborar ya'l gaiteru Las Campas)

Nun quedas más que tu,

nun quedo más que yo

 nesta estraña sala,

ensin naide que nos diga onde ya como falar la nuesa fala.

Tenía rixu yá

de pasar xunto a ti

unos minutos suañando,

ensin un reló que fadie de la que te voi afalagando.

Xuramentu sal ya requesón,

prometimos querenos los dos,

cafiando los nenos,

tou esti tiempu pensé na túa sorrisa ya nel tou xeitu pa espatuxar,

cafiando los nenos,

suañé col momentu de vete na mi vera prestándote acoricar.

Quiero que siga asina,

la túa alma apegada a min,

namás fuelgan los preseos,

 dexando que la piel cumpla adulces tolos sous deseos.

Güei nun hai nada que faer,

 quedémonos eiquí,

pasando l’iviernu,

 diciéndonos seliquín que lo nueso darréu se va faer eternu.

Fantasía nuna copa d'alcohol,

prometimos tornar a venos,

cafiando los nenos,

tou esti tiempu pensé na to sorrisa ya nel tou xeitu pa espatuxar.

cafiando los nenos,

suañé col momentu de vete na mi vera prestándote acoricar.

Cafiando los nenos,

cafiando los nenos.

Callái, que los mios deos esbarien ente los tos deos,

ya con un nidiu envís algamo que se faiga más ceo.

Cafiando los nenos,

tou esti tiempu pensé en tu sorrisa ya nel tou xeitu pa espatuxar,

cafiando los nenos,

suañé col momentu de vete na mi vera prestándote acoricar.

El Cuartu la Riera

Nel sur del Tinéu eternu,

armóse la escandalera,

pos garranon el gobiernu,

las del Cuartu la Riera.

Coleutivu de muyeres,

de muyeres de raigañu,

que nun-ys pasan los seres,

na súa xera, añu tras añu.

Colos vezos ya costumes

que na faza remanecen,

eillí en Tuña, ente las cumes,

onde los frayaos xorrecen.

Tolos paisanos daquella,

esbarrumbanon na trema,

igual qu’en Madrid, Botella,

quien manda acó ye la fema.

Fonon el pueblu exemplar,

porque-y dieron bona maña,

pal sóu nome espoxigar

per cualquier requexu España.

Antroiru, Feria de muestras,

Corpus Christi ya la Llana,

de la folixa, maestras,

ya de l’axuntanza sana.

Ye’l nuesu nucleu rural,

un ventanu abiertu al mundiu,

per aciu’l centru social,

tan prestosu como tundiu.

No escaezas la llamada,

t’esperamos eiquí en Tuña,

au medra la senada,

onde nada s’esmasuña.

Aquende, col meyor xeitu,

na seronda o primavera,

vas afayate dafeitu,

nesti Cuartu la Riera.

     (Al que-y pete que llea cola “ch” vaqueira, refugo llantala porque nun me presta muitu la súa grafía)

¿Vós, qué sois?

¿Vós qué sois: españoles pel mundiu o caleyeros?

LEONOR

Como se quier a la tierra,

seya de Sevilla o Soria,

seya na paz o na guerra;

de la fema, el mesmo amor,

que caltiénse na memoria,

igual que'l de Leonor.

De la vida, lo más guapu,

son l’afeutu y l’alcordanza,

son de baldre, son de papu,

un rescaldu de la vida,

ensin granu nin llabranza,

brota bien la so pebida.

Nesos campos de Castiella,

fasta colar a Baeza,

de la que morriera ella,

camudara a mecigayu,

nada val yá la xamueza

seya d’abril, seya en mayu.

Cólicos nefríticos V

     ...Namái pasar los efeutos del opiaceu, amonta’l dolor al nun atacar l’orixe y nun saber los mélicos nin siquier onde ta allugáu. Aguanto un par de díes más y m’avero a urxencies d’otru hospital pa ver si alcuentro daquién qu’atolene col remediu. Tres la nueva sangrina comuníquenme que voi quedar n’observación puesto que tengo mui alta la creatinina -seique igual tien daqué que ver la mio condición de poeta, pero nun-yos digo nada-.  Danme unes alpargates de papel y pela nueche entamo a espirriar porque son curties y trío col calcañu nel fríu pisu. A lo cabero, nesti sanatoriu, ven pela ecografía un cálculu de 5 mm y una ectasia de 9 de lo qu'informa la Dra. Barcina (que nun ye de Bárzana, pero que ye tamién mui nueva).  Trescurren dos díes más ensin reposar y ensin cebar, yá que me manca entá más al comer. Toi arrodiáu d'otros enfermos qu’iguamos un mal coru quexicones que nun pue dormir y si cavilar nuna montonera coses. Trato d’alcordame fasta de cómo-y llamaben a aquella guah.a del colexu de la qu’escaecí’l nome, anque ensin ésitu. ¡De sópitu, un enfermeru lu glaya al altu la lleva!, nun yera quien a creelu. La vieyina que teo de cote llámase asina y la ta riñendo por llevantase. Pel día, fáenme l’oncenu analís de sangre y sigue amosando altor na creatinina col agravante de qu'anicié amás una anemia. La mélicu m’indica que voi siguir n’observación. Yo-y retruco que quiero sanar nun tar observáu, que si me pon un tratamientu prefiero encamar onde vivo por culpa de que naide m’ufierta una solución. Ella aceuta de mala gana cola perenne alvertencia de tornar si nun dexa de mancar. M’aconseya tamién andar, ensin decatase de que nun me tengo en pie. Colo pa casa atarraquitando d’antibióticos y opiáceos, sicasí nun toi de color amapola sinón blancu amarellentáu. Inda asina, la malura nun desaniciara un res magar que la doctora caltenía que nun tenía yá que doler, arriendes de garrar darréu un constipáu nesti centru...