SOLEDAES

Pente soledaes voi,

pente soledaes vengo,

pente soledaes toi,

bien de soledaes tengo.

Nun sé qué tien el llugar

onde viví, pol que muerro,

onde me quixi afayar,

onde nos mios suaños cuerro.

Nun sé si tando a mio vera

vas sentir mio pensamientu,

de la qu’esguilo na llera,

mientres esnalo col vientu.

Entiendo lo que me basta,

namái entá nun entiendo

como la vida se gasta,

como nos vamos morriendo.

De les coses que me rinden,

deféndome guapamente;

coles que munchos prescinden,

vivo amodo nel presente.

Nun canto por soleares,

si canto al altu la lleva,

nun soi a que llueva a mares,

si soi a algamar que llueva.

Tampoco cantara misa,

como la cantara Lope,

magar que m’entra la risa

al pasar por Veigaipope.

Vivo solu y Soledá

la mio soledá engarama,

que siempres conmigo ta

y dormi na mesma cama.

Mentanto encoplo, otru berra

en cualquier llugar llonxanu,

el mio alcuñu: Pindesierra,

dafechamente asturianu.

Siguimos caleyando pel Madrid de la Percha…

Nel Madrid de les cúpules, crápules, ruines, murnies, miseries y míseros de la posguerra, el faroleru asturianu, ensin nin siquier faroliar un rispiu, prendía lluz a la cativa y desarmada nueche madrilana cola mecha de la so varina máxica ablucando a tolos neños.

Moxigangues

     Sé abondo bien que l’asturiana da nome a un anís y la griega, a una sablera d’Asturies; pero m'importa un res si se lleven o nun se lleven. Sí me fadia que’l que gobierna, seya de manzorga o de dereches, monárquicu o republicanu, m’ande cafiando. De resultes, me prestaría que nun nos tuvieran distrayendo nos medios de comunicación con moxigangues mientres nun actualicen toles pensiones col IPC al que se tien derechu polos años cotizaos, sigan retrasando’l ramu de los tunelones del AVE, nun desanicien les tases de l’autovía –como prometieron– o llanten el céntimu sanitariu fasta na “sopa”.

D'entraes y salíes

     Enantes d’embarcate n’estudiar una carrera, asegúrate bien de comprobar si tien salíes, yá que davezu asocede como coles mesmes puertes de la propia facultá na que coinciden les d’entrada coles de salida a la puta cai. D’esa miente, nun pagarás la universidá privada o refugarás les tases de la pública, nun vas estrumir la mollera y nun sofitarás una engañifa pa finar despachando nun comerciu, sirviendo nun chigre o si acaso en práutiques na oficina de cualesquier ñegreru. Hai otra triba de puertes, pero son d’otra dimensión o altor: hai puertes invisibles per onde pasa’l farsante que nun asiste, hai puertes xiratories pa dise avezando a un futuru programáu de clas, puertes pa xente guapo a la manera del espeyu d’Alicia pa ser a trespasar al so país de les maraviyes y puertes zarraes pa que nun se vea siquier lo que se cuez dientro.

La engañifa la estación china

     Estimaos amigos: prestaríame enforma que toos pasarais una gayolera selmana de Pascua. Yo fino de tornar de Grao/Grau y pruyo por desmentivos que la totalidá de la estación espacial china cayera nel Pacíficu sur. Na primer semeya que tomé con una cámara  Canon EOS 1DX MK II con telescopiu CubeSat incorporáu podéis escuclar l’instante nel qu’esa estación españara al contautu cola atmósfera na vertical de Picarosu (llatitú: 43.4583; llargor: -6.0792). Magar que seya verdá que la mayor parte los fragmentos llovieren sobro esi océanu por aciu de la fuerza centrífuga (Fc=mv2/R), bien d’oxetos de la so sala de too a un euru espardiéronse pel conceyu enantes mentáu. Aporto prueba d’ello cola segunda foto, onde seréis quien a identificar una ruina llinterna procedente del espaciu qu’empobinada a gran velocidá cuasi me fura’l pescuezu de la que cruciaba pela ponte sobre’l ríu Cubia.

El comerciu suaños

De caxes, dibuxos

en policromía.

De plumes, de fusos,

de caligrafía.

De manes, adornos,

mines de colores.

De suaños, entornos,

páxaros y flores.

De llibros, de cuentos,

de meses ya estantes.

Nun ven los momentos,

les coses d’enantes.

De llenzos, pinceles,

tintes y pintures.

Borres ya acuareles,

de clares ya escures.

De ruedes que rueden,

de bien d’enguedeyos.

Pa neños qu’enrieden,

pa otros que son vieyos.

Requexos de maxa,

bolses con mensaxes.

De paya, la paxa;

un día, forgaxes.

Sele y con bon trazu,

cuadernu de rayes.

Comerciu y cabazu,

al so ablugu afayes.

D’ilusión, la tienda,

l’arume a madera.

La entrada a la sienda,

pel cabu l’acera.

Nel rellumu o mate

de fotografía.

Quien nun se decate,

falta–y fantasía.

Cartelu d'alderique

     Esti yera’l testu del cartelu col que me diba a llantar el vienres qu’entra nes puertes de la xunta d’aicionistes del B. de Santander contando que se celebraba en Madrid, pero fino d’enterame que va ser en Santander. Diba a preséntame en solitariu por culpa que los de les centrales sindicales m’esclariaron que nun podíen facer nada, que los otros collacios aceutaron un bonu de compensación por medrana. A min, me lu ufiertaron de 900 euros ya alderiqué que nun aceutaba llimosnes. Siguimos en la llucha “Xuan ya yo”. Xuan ye’l personaxe imaxinariu col que’l mio pá dicía que xugara de la que nun tenía a naide con quien enredar de guah.e.

CRÓNIQUES del FONDU

Hailos que viven del cuentu,

hailos que viven del drama,

otros, del tantu por cientu,

otres, d’ufiertase en cama.

Hai pensiones vitalicies,

hai casos de corrupción

nos que prinden si la picies

y cursos de formación.

Hai dellos que prevariquen,

otros que dicten la llei,

mentanto nun–yos impliquen,

nin a esi cuñáu del rei.

Hailos tamién de manzorga

que viven del capital,

la bayura nun se torga,

qu’a nenguno–y vien mal.

Hai quien critica al d’enriba

y cobra en dineru escuru,

anda refugando l’IVA

y se viende, de seguru.

Ye’l que va esixir mañana

que–y aumenten el retiru,

el que n’engañar s’afana,

el que nunca pagó’l tiru.

Naide me cuente la vida

que yo tamién sufrí abondo,

pero a min que nun me pida

cuando espoxiga nel fondu.

Mientres el Frente del Vieyu

de cutiu toma la cai,

van aneciar a degüellu,

solución: ¡ACTUALIZÁI!

Proposición ya hipótesis

     Nestes semeyes somos a decatanos de la confrontación surdida col problema del espatarre y l’abegosa igua del escoyone. Apliquemos al casu la física cuántica col afamáu principiu d'incertidume d'Heisenberg y los sos dos postulaos que son (pa los que nun teais estudiaos o seyáis de lletres):

1) Nun ye posible conocer con exactitú l’allugamientu d'una partícula de la pierna d’esti paisanu nun intre de tiempu, pero sí ye posible conocer la probabilidá de que dicha partícula s’atope nun llugar nun momentu dao.

2) Les partícules intercambien enerxía ente sí nuna cantidá mínima posible, o múltiplos enteros d'esa cantidá que se denomina "quantum".

     De resultes, si se sienta una moza a la so vera ¿cómo resolver l’enguedeyu? D’entamu, nun vamos saber con exactitú la posición d’una partícula de la pierna d’esa fema; sicasí si ye posible conocer la probabilidá de que dicha partícula s’atope cola partícula del bien cebáu y por ende cuasi toles célules de les sos piernes. Nos alcontramos entós con otra incertidume amestada a la d'Heisenberg col inconveniente d’allugamientu ya adautación. Nun me fuera d’utilidá’l diagrama de Friedmann nin delles teoríes al respeutive, pero a lo cabero fui quien a resolver la tema cola mio proposición del rozamientu que se basa na mio hipótesis de compartimientu d’espacios que na práutica la vais garrar fácilmente. Escurríi que, si la rapaza llanta la so pierna derecha sobro la esquierda del espatarráu, van compartir enerxía ya al tiempu vamos solucionar el problema del espatarre ya arriendes l’abegosa igua del escoyone.

El mio caserón

D’esa tierra noble,

la que yo más quiero,

traigo un pasudoble

col so son mineru.

Qué curioses son, madre,

 qué prestoses son.

Falo de la casa onde yo naciera,

la casa más guapa del Cuartu la Riera.

Qué curioses son, madre,

 qué prestoses son. (bis)

Estribillu:

So la so panera vuelen caparines

y baxo’l bistechu añeren andolines.

Tien una fornera na qu’arroxa’l pan,

pende yo cantaba igual qu’un raitán.

Qué curioses son, madre,

qué prestoses son.

Qué perguapes son, madre,

 les coses del caserón.

D'esmeralda'l campu,

de zafiru’l cielu

ya’l mio pullu blancu

ye de terciopelu.

Qué curioses son, madre,

qué prestoses son.

Canten ruiseñores,

canten los xilgueros,

canten segadores

y los camineros.

Qué curioses son, madre,

qué prestoses son. (bis)

Estribillu:

So la so panera vuelen caparines

y baxo’l bistechu añeren andolines.

Tien una fornera na qu’arroxa’l pan,

pende yo cantaba igual qu’un raitán.

Qué curioses son, madre,

qué prestoses son.

Qué perguapes son, madre,

les coses del mio rincón.

¡A BAILLAR!

Muerro por ella ensin saber

si l’alcontré o m’atopara,

yá nun m’alcuerdo perdi’l ser,

porque a la fin me sulfatara.

Muerro por ella que me da

un fuerte arume de Pachá,

muerro por ella cuando ta.

Muerro por ella yo tamién,

a matar dos, tamién ye quien,

ella ente toes más golor da

 porque ye encesa como un chuchu,

 ella al mio llau pa siempres ta,

 pue sotripame en soledá,

más me valiera a min qu’ella goliera a cuchu.

Otra musa qu’ensin sida,

va acabando con mio vida,

nel panderu que ta murniu,

la muerte de turniu

m’escucla si surnio.

Muerro por ella que me da

bien d’aforfugu pol mio mal,

 l’alerxa manca de verdá,

yá podría echar H.enu de Gal.

Muerro por ella que me da

esi golor na realidá,

por aciu siento morrer yá.

Cómo alito cuando falta.

Muerro por ella nun cairel.

Col so arrecendor te valta.

Muerro por ella so la piel

y ella canta y m’atraganta,

pol síndrome químicu espanta.

Muerro por ella y naide más

pue esgatuñar dientro de mio,

ella t’arrampla la vida a tatás,

muerro al pie de so,

muerro al pie de so.

                                                                                                                              

Carta al mio tíu

(Semeya d'alferez)

Carta al teniente Benino Rodríguez Suárez

Cualesquier cuneta del Frente de Llevante, ensin númberu.

Queríu tíu:

                   

           Tuvi dellos años a la gueta la to buelga pelos arquivos de Salamanca, Valencia, Ávila, Segovia, Guadalaxara y n’otros muérganos oficiales ensin un res de suerte. Quería camentate que de nada valiera’l to sacrificiu por cuenta que l’amarraza se perdiera y los cabezaleros de la República trespandaron motorizaos les fronteres abandonando a la tropa. Miles d’exiliaos algamaron la llende con Francia y los franceses los malafayaron en campos de concentración ensin nenguna aida de los países de los abelugaos qu’agora mantenemos nós equí. D’otra miente, tampoco fuimos a alcontrar al to hermanu mayor pente les sables del desiertu marroquinu; sicasí, güei se cumple’l catorcenu cabudañu d’una desaxerada llaceria onde un puñáu de magrebinos a los que nun–yos torgaron el pasu españaron a 192 paisanos y firieron a milenta. Amestar qu’ellos, tres d’escorrenos de Marruecos, tamién nos aventaron del Sahara, onde nos tirotiaba caldía’l Frente Polisariu Saharaui qu’amás prindaba pesqueros y que de resultes matara a una montonera españoles, sobre too canarios. Güei alderiquen que tenemos obligaciones pa con ellos y nos manden a los sos guah.es a campamentos de branu. No que se refier a tolos países que nos echaron de Suramérica, los sos emigrantes talamente s’allegaron por millones y nacionalicen a los sos neños españoles ensin dexar de festexar la so respeutiva fiesta nacional del día nel que nos espulsaron.

         Voi finar camentando que n’España siguimos amarraos y que los más célebres partíos mangoniaron colos cuartos y retayen el retiru a los vieyos, anque estos anecien en votalos por culpa qu’a los qu’asoleyaron–yos tienen aínda más medrana. Mientres, al albentestate, paecen reproducise los sicópates que lu mesmu asesinen a una muyer qu’a un neñu, y los robos, fechoríes y ocupaciones de cases se multipliquen ensin unes lleis acordies a los delitos. En resultancia, esto pinta cada vez peor.

                
                El to sobrín que t’estima y nun t’escaez.

La foto del arreniego

Nada, nada nun había,

nin s’amuesa la color,

como pa que te sorría

el neñu pente’l mugor.

Abondo que pa comer

entraba’l dineru en casa,

nun lu soi a escaecer,

magar que la vida pasa.

Remanecen alcordances

y namái qu’un par de fotos,

unos llograron avances,

otros, los calzones rotos.

Unos, milenta semeyes,

otros, poques ya engurriaes,

caleyabes a cencielles

pente les autoridaes.

A cencielles, cola nada,

cola nada que dexaron,

enredabes cola estrada,

que lo demás lo llevaron.

Xugabes ensin trebeyos

per cais entafarraes,

que tolo ganaron ellos,

los mios daben les callaes.

Foi prindao al enemigu,

ansí lloraba la fueya;

vos arreniego y maldigo

por desaposiar a ella.

Que más semeyes quería,

sobre too de los fíos,

pero nada más había

que murnia, tristura y fríos.

ESPATARRAOS

     Per Madrid, ensin novedá; tiénenlo too bien atao. La medrana ye un reyu qu’arreya mui apertáu. Aínda ceo, cola fuelga xeneral de Metro, los trenes furrulaben meyor qu’otros díes. Nos vagones, una montonera muyeres se treslladaben a la so xera, yá pararán les otres. Pel altor, la xente guapa sigue trespasando les puertes xiratories talamente como enantes. A lo baxero, otros a los que–yos prestaba cobrar en ñegru, agora glayen pola xubida de la so pensión mínima. Los de los escaños nun tienen nengún problema, siete añinos y a cobrar una burricada. Los emplegaos del Popular a los que mangaron les aiciones, mientres callen (como los sindicatos), siguen pagando l’anticipu de lu que–yos ramplaron a los que paparon los sos aforros. Un vocal de los que pueden agora en Madrid denuncia que t’apuñalen por 500 míseros euros. Esto tien mala igua por culpa que paez tema de la condición humana y esa nun la vamos camudar. Mentanto, colingaron cartelos pa que naide espatarre y teamos entreteníos con comedies ya amarrándonos ente nós. Siempres nos quedarán los vieyos…

Progresamos

     Munchu adelantáramos cola Alministración dende que furrula’l teléfanu. A bien de muérganos oficiales yá podemos llamar enantes d’averanos a ellos y de faer cola na respeutiva ventaniella pa sentir el personáu “Torne vusté mañana”. Anguaño, esos teléfanos, de la que dexan de comunicar a les dos o tres hores, yá disponen d’un discu informativu qu’espeta: “Tolos nuesos axentes s’alcuentran ocupaos, permaneza a la espera”. Ye verdá que davezu se corta la comunicación dempués de tar aguardando una montonera de tiempu, cuando non –al ser a contautar– te cuelguen porque daqué qu’entrugues–yos resulta abegosu d’esclariar; magar que, con too y con eso, t’endilguen que progresamos. Asina que nun pierda la paciencia y ¡Llame vusté mañana!