Nel Paraísu

Tendí les mios ilusiones,

nun pentagrama de suaños,

esnalaben colos sones,

baillaben colos raigaños.

Colos agudos xubíen

y colos graves baxaben,

los acordes espardíen

xeitu pa los que finaben.

Un coru de rapacinos

cantaba la gloria pura,

retrucaben querubinos

con voz de tala bayura.

Fasta’l Carriquín del Rei

llegaren los contrapuntos,

a esconderite, l’ivéi,

coles estrelles, toos xuntos.

Esperances y escaezos

surdíen del pentagrama,

notes d’estaferia y vezos,

adaxu que'l cielu algama.

Espeyaba’l Paraísu,

viesca, braña y manantial,

de mar y vallina’l visu,

cume, ríu y rebollal.

Talamente como Asturies,

a midida celemín,

nun t’enfotes nin t’enlluries,

tas nel Paraísu, nin.