Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

lunes, 3 de febrero de 2014

ÑEVA



     Ñeva sobre Madrid, esta vegada dieron nel clavu los meteorólogos. Daqué sotripa güei la caspa les ñubes y esta caye sobro l’afogante ciudá. Los vehículos y les chimenees cuspen el so fumu al cielu para refugala, mientres qu’ella aporfia en esbariar ente la sorrisa de los neños que-y dan la bienvenida. La xente s’abriga y retaca les ventanes de les cases pa que nun entre’l fríu. Bien de díes enantes, la temperatura foi más baxa y esa mesma xente caleyaba en caldia colos sos problemes ensin decatase de la pelona. Sicasí, gran parte d’ella quexa col fríu del iviernu de la mesma mena que maldiz la calor del branu. L’ensame y el so quexicar güei caleyen xuníos baxo esa caspa nidia y blanca qu’anecia en cayer. A min, que soi como los neños, me presta que caiga; magar que, dacuando en vez la desapiegue del chaquetu. D’otra miente, nun soi quien a amosavos una semeya p'amestar a esta caxigalina, yá que llanté un calcañu pencima l’escáner y agora deprendí, acolumbrando los cachos, que nun hai que lu triar pa nun esgoncialu; asina que tenéis que vos conformar cola primera que tope.

No hay comentarios:

Publicar un comentario