Sobro dellos comentarios nel Fesbuc

 

Finaron con bien de vezos, Marcial, pero enxamás van ser esqueicíos mientras los recordemos. Llegaríemos enantes de les postales, Blanca; sicasí, bien d’ellas se caltienen nel tiempu. Siempres vas tener esa coleición nel cantu la memoria, Berta. Desaniciaron el corréu, les cartes, les propies postales… Robáronnos fasta los mesmos sellos, magar que nun van ser quien a torganos de suañar, Marga. Nesa caxa remanez la maxa y les alcordances d’otra dómina que nun va desapaecer mentanto vivas, Ninfa. Tienes que recuperala, Alicia, ye parte del to país de les maravíes. Camudánonlas pol aborrecible “guasap” −que nun tien guasa nenguna−, anque nun van terminar con nós, hermanina Ángeles. Munchas gracias, Mili y muitas gracias, Josefina. Pa remate voi asoleyar otra partida d’eses ayalgues, qu’acorico nun llugar secretu mui bien cerca del mio maxín, pa fadiar entá más a los que quieren acabar coles bones costumes y qu'arriendes perdamos l’aldu.

Un candial abrazu pa toos, amigos.

 

La coleición de postales

 

Tanto tienes,

tanto vales,

canta onde te detienes,

la coleición de postales

 

¿Ye presente?

non, pasáu,

magar caltiénse llatente,

neses estampes, posáu.

 

L’alcordanza

te tresllada

a aquel tiempu, n’alloñanza,

n'otra vida yá pasada.

 

Hai dalgunes

que te fienden,

espeten como les brunes,

mientres que los años llenden.

 

Familiares

que colaron,

dellos montes y llugares,

mocines que nos amaron.

 

Con respetu,

ta perclaru,

porque al amor poníen vetu

y el pecáu salía mui caru.

 

Nun requexu

s’acoriquen

recuerdos, papel encesu,

que t’allegren o enfociquen.

 

Güei ñublará

los de Xelu,

l’andanciu lu soterrara,

cunten que xubió pal cielu.

 

Tanto tienes,

tanto vales,

histories que nun son bienes,

son coleición de postales.

 

La Variante pega'l "cante"

 ¡Los túneles ferroviarios de Guadarrama tienen un llargor de 28,4 km y tardaron namái que 32 meses en llantar el ramu!

Muncha xente se figura

 que la copla ye mui vieya,

mientres dura la fartura,

nada siente na so oreya,

pero cuidao que lo vivo

voi finar coles pamplines

ya esi espiatoriu chivu

qu’allugaron yá nel Ginness,

y por nun llorar me río

 cuando diz doña Anxelines

que’l cantar ta escaecío.

 

Anda y vete col to cuentu

 de que se perdiera’l cante,

yo lo siento a pasu lentu,

más lentu que la Variante.

Enredaron el duviellu

col retrasu y el cairel,

ye como’l cantu un cuquiellu

de querer y nun poder.

Hai pelgares ensin tientu

nesa copla tan cafiante

d’otru mal procedimientu,

conque vete yá col cuentu,

col cuentu de la Variante.

 

Enredaron el duviellu

col retrasu y el cairel,

ye como’l cantu un cuquiellu

d'un AVE que va al Musel.

Hai pelgares ensin tientu

nesa copla tan cafiante

d’otru mal entendimientu,

conque vete yá col cuentu,

el cuentu de la Variante.

Corazón de tango. Dr. Deseo - Euskadiko Orkestra - Fernando Velázquez

 

Tuvisti que dicime adiós,

cais fundíes so pies de magüetos,

pa echate en falta hasta la muerte

y yo baillando al ritmu de los mios zapatos prietos,

como veleta al vientu fuerte.

Corazón de tangu, tengo'l cuerpu de xota y soi

un aprendiz d’estrañu,

qu’en brazos de la soledá, toi

vendiendo l’alma al diañu

ya equí tu y yo brindando entá, ¡rediós!

Vamos engañanos y dime’l mio cielu qu'esto va durar siempres.

Perdeme nos tos brazos, duce llocura,

tu, la mio droga más dura.

Vamos engañanos y dime’l mio cielu qu'esto va durar siempres.

Perdeme nos tos brazos, duce llocura,

tu, la mio droga más dura.

Corazón de tangu, tengo'l cuerpu de xota y soi

un aprendiz d’estrañu,

qu’en brazos de la soledá, toi

vendiendo l’alma al diañu

ya equí tu y yo brindando entá, ¡rediós!

Vamos engañanos y dime’l mio cielu…

El Día de la Madre

  

Nun nos valió que Galeríes Preciaos camudara’l Día de la Madre al mes de mayu aportiando vezos foriatos. Pa nós caltiénse nesi 8 d’avientu, afitáu en 1854, nel qu’axuntábemos tola familia, festexando arriendes el so santu y el so cumpleaños. Esta foi la primera estampa que−y dediqué esi día del añu 1959, con 6 años cumplíos, col que foi bien seguru tamién el mio primer mal encople. ¡Enxamás t’escaeceré, mamina, seya’l día que seya!

Cróniques del Kepler

 

Fino de tornar a la nuesa realidá virtual dende’l Kepler-186f, onde pasara unos díes, a traviés d’un furacu de cocu. Nun vayáis cavilgar que pa los humanos ello seya tan abegosu pola mor de que pa munchos treslladase o portase como un guxán ye bramente cenciellu. Foi’l casu que los keplerinos andaben camentando que delles besties asesinaren a dos periodistes españoles que denunciaben a otres besties de la mesma triba que coles mesmes mataben a otros inocentes animales terrícoles nel África africana. Ablúca−yos a estos planetarios foranos que los que cunten na nuesa tierra que son más civilizaos seyan los más burros y los más inorantes, cuidao que nun son nin siquier a considerar l’elemental drechu a la vida que tamién tienen los nuesos vecinos más febles.

Un país

 

Sé d’un país au la casería valta,

sé d’un país au tamién cayera l’horru,

sé d’un país onde yá’l paisanu falta,

sé d’un país qu’arriquez al más ceporru.

 

Aquel reinu onde reina la desidia,

un principáu que perdiera los principios,

un paraísu al qu’empuerquen la piel nidia

ya escaecen los pabardos nos sos ripios.

 

Ellí onde amburen montes y animales,

onde remanez pa siempres el cartuchu

sobro vallines con centros comerciales

que foron camudando en borrafa’l cuchu.

 

Onde’l fumu foi algamando a la nublina

pente’l que’l foriatu escapa col nuesu oru,

quien terrén, ríu y regatu contamina,

mientres que l'aldeanu se−y abulta xoru.

Au coles variantes tómennos el pelo

ya una llingua milenaria nun esiste,

mentanto que t’afalaguen: Lelo, lelo…,

los páxaros que mazcayen tol alpiste.

 

Esi país qu’hai cuantayá que desanicia,

un país nel que se merca’l so silenciu,

un país nel qu’espoxiga l’avaricia

y el xacíu va eslliendo nel vertenciu.

 

El fíu de Xuacu

 Hai bien de paisanos a los qu’esto del andanciu nun−yos pintó nada mal. Mesmamente’l mio collaciu Xuacu, que nun ve a la moza dende hai más d’un añu por culpa’l zarru perimetral, tuvo de recién un fíu con ella por teleconferencia. Pa remate, un vecín d’ella (amigu íntimu de dambos) que ye xinete de carreres −según unos− o especialista en monta −según otros−, −yos va a pagar la convidada’l bautizu. ¡Munches felicidaes, Xuacu!

Efeméride

 

Caldía ye’l día d’una patochada que nos llanten; por embargu, güei paez que nun ye’l día de nenguna fatada. Diba a asoleyar esti poema, cuando aína cayí na cuenta que la repunante efeméride podría ser la del 47º cabudañu del mio pá; sicasí, nun voi recular…

 

Nel cortexu del entierru,

que ye un cortexu diariu,

sientes lloros, dalgún berru

y cualesquier comentariu.

 

El muertu siempre foi bonu,

menos cuando taba vivu,

tenía un caráuter tronu,

cafiante y mui impulsivu.

 

Fálase de tou un pocu,

más que falar se marmulla:

aquel paisanu ta llocu,

siempre ta metiendo bulla.

 

Se pregunta poles vaques,

si semasti yá los ayos,

si sacasti les pataques,

si rozasti los escayos.

 

Polo que saques de renta,

pola vecina d’al llau.

Fálase más de la cuenta,

toos menos el fináu.

 

Se para de dar pel sacu,

¡yá valió, cago en mi mantu!,

baxa la caxa al furacu,

dientro ensin movese’l santu.

 

Yá reza’l responsu’l cura,

col feligrés soterrañu:

esta vida ye mui dura,

¡Dios nos llibre del diañu!

 

Repítese ansí la historia,

mientres el muertu t’alvierte,

na gloria pela memoria,

morrer ye cuestión de suerte.

 

Pal to guah.e, pa la neña,

asoleyo la mio obra,

pal paisanu, pa la peña,

d’un poeta que nun cobra.

 

Para'l bien intencionáu,

pal que calca nel me gusta,

pal que caltiénse al mio llau,

pa quien s’amarra na xusta.

 

Pal que ta siempre a la chisba,

magar que nun dexa buelga,

pero que torna a la tisba,

pa esi colingáu que cuelga.

 

Pal que vive mermurando,

pal que sabe lo qu’inora,

pal d'unu ya otru bandu,

pal que nun da nin la hora.

 

Pal qu’afaya nel puestín,

pal impostor de la tele,

qu’a midida celemín

anda chapurriando sele.

 

Pal que reburdia na prensa,

bramando nos comentarios,

pal qu’anecia cola ofiensa

por intereses sectarios.

 

Pal Feisbuc y l'antibable

de la cai de l’Amargura,

qu’enxamás echan un cable

y refuguen la cultura.

 

Tolerancia

      A don Euxeniu, un maestru de llingua y lliteratura castellanes que tuvi de guah.e, se lu foi fumando’l tabacu. Na cabera vez que lu vi, yá de vieyu y nes áscuares, seique taba dando les últimes bocanaes. Daquella, entamé a sentir abonda culpabilidá al defraudalu por aciu de lo munchu qu’esperaba de min. Nesa dómina los docentes podíen fumar nes aules y de resultes toos fumábemos ya envelenábamos a un tiempu. Nel mio casu, y por culpa’l cuadru d’alerxa, rinitis y sinusitis, aportábame arriendes episodios d’afuegu ya una montonera llárimes y farinxitis pa escoyone de los otros neños. A lo postrero, paez que fui a escaecer lo mal que lo pasé y non el ciñu que−y guardaba pola so considerancia. Pueque si toos caviláramos ansí en toles facetes de la vida, y sobre manera nel terrén políticu −que tantu inflúi sobre la nuesa propia llingua asturiana−, dexaríamos d’amarranos d’una puta vegada.

La panera

 

     En cualesquier sitiu o en nenguna parte. Nun llugar qu’entá nun quixi escaecer. Nel mediu del monte o en mediu’l valle. Onde daquella nun quixi riñir. Ellí taba la panera: tan guapa, tan gayaspera, tan zarrada a la so vera. Naide seya a entrugame que nada más voi esclariar. Foi’l casu que púnxime a tirar una semeya y nel intre saliera una muyer glayando a la so ventana: ¿Por qué la fai fotos? ¡Nun quiero que les faiga! D’entamu cuntaba que yera de coña, pero nun yera de chancia. Amestóme que tol mundiu facía lu mesmu. Decatárame que l’espolín sedría por dalguna razón ya−y retruqué que nun enfocicara, que la retrataba porque asoleyaba mui curiosa y me gustaba. Yo, aldovino la causa, magar la voi callar: vixílennos na solombra. A dalgunos−yos va paecer bien. A otros−yos va paecer mal; sicasí, en cualesquier sitiu o en nenguna parte, esiste −o non− esa panera de la engarradiella. Naide camiente un res. Naide chive l’allugamientu, si lu sabe, que bien seguru nun−y va a prestar a esa paisana.

Kantauriko kostaldea

 

Kantauriko kostaldea,

marejadako iparralde,

bici zara verdea,

zeru grisa eta iturralde.

 

Gizon noble guztiak,

begirada argia,

gazta eta sagardoak,

jazarritako hizkuntzak.

 

Tradizio harrigarriak,

meategiak eta basoak,

baserriak eta biltegiak,

izaki mitologikoak.

 

Kantauriko kostaldea,

marinelen lurra,

Itsasgizonen lurraldea,

maite nostalgia iturra.

Egoísmu

 

La crítica de la casta

y del que no contribuyi

s’escaecen cola pasta

y cuando’l qu’enriquez fuyi.

 

El “youtuber” y el políticu,

el probe ya’l desquiciáu,

afamaos pol puntu críticu,

se despinten pa otru llau.

 

La color ye según toca,

pero se trabuca en pagu,

la comenencia, de boca,

¿pa que papar un mal tragu?

 

Asina ye l’idealismu,

camuda col capital,

porque l’humanu l’egoísmu

ye un sentimientu normal.

 

Yo’l refugu de la envidia

nunca enxamás lu sintiera,

caltengo una vida nidia

esfrutando’l monte y riera.

El güevu fritu

 

Cuando l’atapecerín,

esi sol ye un güevu fritu,

que se rustia seliquín

ya aguanta como un benditu.

 

Ente la clara de ñubes

ye una xigantesca yema,

l’aprecies de la que xubes

a un altu con una fema.

 

Porque ye mui atrayente

pa tol que ta namoráu,

mientres lu inora la xente,

tu lu mires ablucáu.

 

Nun vas ver la so membrana,

nin siquiera la cubierta,

pos nun−y da pola gana

caltener la vista abierta.

 

Nun s’amuesa pela nueche,

nunca tuesta nel escuru,

nun ye tema mala lleche

nin por ser un güevu duru.

 

Ye qu’al día−y pon velu

ya’l saín d’esta manera

apaga nel finxu’l cielu

y sal la lluna llucera,

 

que nun quema nin arroxa

como’l güevu na pelleya.

Ansí socede la cosa

dende que’l sol esperteya.