El Escorial del revés,
toi sentáu nel otru mundu,
como Felipe II,
al aviesu, ¿nun lu ves?
Nun ye la siella del rei,
ésta ta nel otru andar,
per onde fuera a esguilar,
al nun ser real, ¿acuéi?
Ye namái un mirador,
na ruta del picu Abantos,
al que xubiéramos tantos,
que baxamos pol mugor.
A mio vera’l monasteriu,
un monasteriu imperial,
ésti sí que ye real,
magar qu’un real misteriu.
Ye la octava maraviya,
que festexa San Quintín,
la trespando pel camín,
ensin rustir na parrilla.
Per detrás, La Ferrería,
una viesca con fechizu,
na que nun crez el berizu,
pero brota poesía.
Mientres torgo’l mio llamentu,
voi gastando la mio vida,
pa ganame la comida
y ser a vivir del cuentu.
Fino llantando’l rebite,
asina’l mio mal espanta,
qu’invitáronme a la xanta,
anque pagué yo’l convite.
No hay comentarios:
Publicar un comentario