Choyu

     Mercara esta figura na feria d’Arcu 2019 hai pocu más d’un mes por tres mil euros ya agora resulta que la muyer nun la quier. Pruyía por dir a la manifestación pola oficialidá del asturianu –magar que yo soi más de cooficialidá– el sábadu qu’entra a Xixón, pero ella me torga de gastar cuartos nesi viaxe que fadría dende Madrid puramente con esi envís. Amiéstame qu’abondo tiempu y dineru esbardio yá cola mio xera de sofitu a la llingua pa nun sacar nunca provechu nengunu, como pa marafundiar aínda más. Por culpa d’ello, asoleyo a la venta la mentada figura en namái que dos mil euros por si dalgún tratante d’arte de les brigaes antibable tuviera interesáu nesti choyu.

La pita Pacina

La pita Pacina

ya’l pitu Agapitu,

perbaxu l’ancina,

queden en pie fitu.

Con forma de ñeru,

baxo la so rama,

fuera del piteru,

llantaron la cama.

So les abiyotes,

que dacuando cayen,

–yos ven los más zotes,

que davezu glayen.

Qu’arriendes del glayu,

el cuervu o coríu,

tamién el más payu

emite’l glayíu.

Y ruempe la calma

de la soledá,

ellí onde l’alma

afayada ta.

Guaria los sos güevos,

la pita Pacina,

seis pitinos nuevos,

va ablugar l’ancina.

Radicales llibres

       Los radicales llibres son molécules inestables que percuerren el nuesu cuerpu intentando pañar un electrón al envís de recuperar la so estabilidá eleutroquímica. Por culpa d’ello, son bien peligroses, porque p’algamalu ataquen molécules estables. Una vegada que'l radical llibre consiguió robar l'electrón que precisa pa empareyar el so electrón llibre, la otra molécula camuda coles mesmes n'otru radical llibre, empecipiándose asina un ciclu destructivu para les nueses célules.

     Eso ye pura física. Lo peor de la tema ye cuando los demás radicales llibres –de toa triba– furrulen por mala química. D'esta miente, anden focicando pelos tos blogues, les tos páxines y la to mesma muria del Feisbuc pa reburdiar escontra lo que políticamente nun–yos gusta. Estos radicales puen allugase azorronaos ente les tos mesmos amigos o collacios y nunca comenten nada, esceuto cuando se–yos abulta que yeres de los otros, magar que nun lo seyas. Davezu nun garren lu qu’allugues nel to artículu d’opinión por culpa de la so inorancia, yá que nin siquier saben lo que ye un ensayu. Son los “hooligan” de la política que se radicalizaron por ella. Guarden rocea ya un odiu visceral a tol que nun cavilga como ellos ya enxamás van llograr la mentada estabilidá. Tampoco son a decatase de que los suyos tamién cuenten troles y prometen en dómina electoral delles coses que nun van cumplir. Ye’l casu qu’estos radicales llibres abonden cada vez más y me toi plantegando l'astención n'usu de la mio llibertá ensin radicalizar; arriendes de pa que nun m’engañen.

María l'Americana

Peles nueches de lluna y de fríu,

l’americana de Portugal,

al debalu pel ríu,

son ateríu,

un cantar fixo real,

que lu canta María

al querer d'un andaluz.

María ye l’allegría

y l'agonía

d’un ser qu’esmuz.

Que fora namorando

naquella tarde

del vinu verde qu’arde,

y ente palmes de fandangu

foila enredando,

llevándola’l corazón.

Y na sabla Canela

foron perder la razón,

onde’l mar ye acuarela

besó–y la boca

y amó na roca.

¡Ai, María l’Americana!

Dende Ayamonte hasta Faru

s’oi este fadu

per tol Guadiana,

au bebe “vinho" qu’ambura.

¿Por qué canta con tristura?

¿Por qué esos güeyos zarraos?

Por amores desgraciaos.

Por eso glaya, la so amargura.

Fadu

porque estraño los sos güeyos.

Fadu

porque me falta’l so aliendu.

Fadu

porque nel ríu yá a mueyu.

Fadu

porque se fuera morriendo.

Dicen que foi’l “te quiero”

d'un marineru

razón del so carecer,

que nun barcu anochando

de contrabandu

pal llagostín foi al paecer.

Yá n’avesíu del ríu

un disparu sonó

y d'aquel sufrimientu

nació'l llamentu

que l’allorió.

La mio hestoria

     Los mios pas ñacieron nun occidente entá más desconocíu qu’agora. Como nun yeren meirazos tuvieron que colar d’Asturies yá enantes de la guerra. Por culpa d’ello yo nací onde me dio pola gana tras d’una procesión del día’l Carmen. Pasé la neñez afogándome y d’escursión al Institutu Antidiftéricu. De guah.e fui a un colexu que nun amosaba placa por causa de l’amarraza. Fixi la comunión ensin algamar nin siquier a vicealmirante. Trabayé y estudié a un tiempu y me titularon de Bachiller Superior, pero nun fui quien a ser economista porque un día me decaté qu’aquello yá lo sabía ya una nueche colé de la universidá. Cortexé pocu por pura cortedá y me casé cola que me paeció más curiosa. Como yera probe, namái tuvi un fíu; sicasí, abondo más llistu que yo y que sí foi a finar delles carreres. Camudé de xera y me caltuvi trenta años en banca. Aforré ya invertí n’aiciones de la mesma entidá col envís d’aselar la vieyura, magar qu’un mal día me pañaron tol “botín” y ta perclaru que finó en Santander. Anguaño encoplo y compongo pa escaecer les mios penes anque me sal al aviesu. Arriendes, nun puedo espublizar y pa remate’l mio padrín morriera hai yá cuarenta años. Davezu ando pel monte cola intención d’alcontrame a min mesmu; pero, por puru despiste, nun faigo más que perder coses. Carecí dalgún qu’otru drama aparte que yá vos cuntaré más alantre n’otros selce minutos.

Na sidrería de Lloviu

     Siguimos esguilando al debalu pela faza baxo’l fechizu del monte sagráu d’Abantos, l’encantu de “La Herrería” y les corrientes telúriques del monasteriu de San Llorienzu. Pa que nun falte de nada, a 150 metros d’ésti, na cai Xaquín Costa, 8 a Carlos –enrazáu en Tinéu– se–y ocurrió abrir una sidrería, que quixo nomar “de Llovio”, onde xintamos. Ellí nos afayamos como en ca’l güelu dende qu’entamáramos el nuesu particular camín aniciáticu pel conceyu de El Escorial. La ufierta: sidra, llicores y toa triba de productos asturianos abondo bien cocinaos; pero, sobre manera, l’amabilidá de Carlos y tola so parentela. Arriendes, pa los vexetarianos como yo, siempres s’alcuentren dispuestos a camudar daqué del platu del día por dalgo que seyas a comer, talamente como en cualesquier otru restorán de los que me conocen pel occidente y centru d’Asturies. Nestes semeyes podéis escuclar a Carlos col so fíu Xabel (Javi) ya una de les raciones coles que me ceben (¡cómo pa quedar con fame!). De lo que nun vos vais decatar ye qu’al llombu de la so camiseta asoleyen una escomunal Cruz de la Victoria.    

Fina'l Día la Poesía

Fina’l Día la Poesía,

mañana será’l del Agua,

hai Día de l’Armonía,

y siempre un día que nagua.

Hai Día de la Salú,

tamién Día de la Muyer,

anque non de la Virtú,

nin tampoco de la Ester.

Seique lu hai de la Radio

y de Xusticia Social,

magar tea de mal fadio,

que la xusticia anda mal.

Hai de la Llingua Materna

y de la Vida Montesa,

non de la llingua paterna,

pola inclusividá esa.

Contra Discriminación

ya arriendes el del Deporte,

otru de la to nación,

ensin festexar la cohorte.

El de Llibertá de Prensa

y, como non, del Amor,

pémeque de la Defensa

ya’l de Derechos d’Autor.

Amás de la Tolerancia,

el día Mundial del Sida,

ansí, otru de la Infancia

y toa triba de vida.

Nun sabrás qu’hai del Retrete,

igual que lu hai del francés,

celebra lu que te pete,

mercando nel Tayu Inglés.

Col del Pueblu Palestín,

que se vea la xaceda,

camina pel bon camín,

que tienes qu’entrar en breda.

Inglés, sí; asturianu, tamién.

El PP pide más horas en inglés y "no en ese bable que ustedes venden" https://www.lne.es/asturias/2019/03/14/pp-pide-horas-ingles-bable/2441242.html

Esto ye Asturies: Si nun vos gusta la so llingua y la so cultura podéis colar a comer frixuelos a otra parte lloñe de los sos escaecíos horros. Nun nos vengáis encamentar lo que tenemos que faer aquellos que respetamos ya amamos lo nueso ensin que vendamos absolutamente nada. Inglés, sí; asturianu, tamién. Arriendes, la tortura nun ye arte nin cultura.

This is Asturias: If you do not like its language and culture you can go to eat frisuelos elsewhere away from their forgotten hórreos. Do not come to us to recommend what we have to do those who respect and love ours without selling absolutely anything. English, yes; Asturian, too. By the way, torture is not art or culture.

Esto es Asturias: Si no os gusta su lengua y su cultura podéis marchar a comer frisuelos a otra parte lejos de sus olvidados hórreos. No nos vengáis a recomendar lo que tenemos que hacer aquellos que respetamos y amamos lo nuestro sin que vendamos absolutamente nada. Inglés, sí; asturiano, también. Por cierto, la tortura no es arte ni cultura.

Ceux-ci sont les Asturies: Si vous n’aimez pas leur langue et leur culture, vous pouvez aller manger des frisuelos ailleurs, loin de leurs hórreos oubliés. Ne venez pas nous recommander ce que nous devons faire ceux qui respectent et aiment ce que nous avons sans rien vendre. Anglais, oui; Asturien aussi. À propos, la torture n’est ni un art ni une culture.

Te quiero llibre

Voi llantar la ocurrencia d’un paisanu que nun tien nin siquiera Feisbuc qu’asegurara que, col son de Nando ya esta lletra, naide más diba a xubir al árbol a pañar flores pa nenguna morena.

Te quiero verde, te quiero,

verde ye’l valle encantáu,

(bis)

la rama, l’aire ya’l tueru

d’un sentimientu amestáu,

la borrina nel senderu

que naz y muerre al mio llau.

Te quiero llibre, te quiero,

llibre como’l maxín míu,

(bis)

esi arremangu melgueru

ya un suañu ensembre firíu.

(bis)

Y llibre yes tu,

la tierra callada,

qu’arrames grisú

cola bocanada.

Y llibre yes tu,

mio Asturies amada,

qu’espardes virtú

a cambéu de nada.

Te quiero como te quiero,

porque fuisti la primera,

(bis)

sobro esi cuetu cimeru,

sollerte na rabasera.

(bis)

Ya afalagará

esi orbayu amigu

que te llevará

pa siempres conmigo.

Concursu

     Saliéramos de El Escorial pela vía 3 y tornamos pela 2. Too asocediera tan apriesa que nun me diera tiempu nin a preséntame a esi concursu de relatos curtios al que nun me diba a presentar. Hai cuantayá que, pa min, sobren les presentaciones.

La tristura de Piqué

(Piqué, La Sexta)

Un perro persigue por la autopista al camión que llevaba a su rebaño de ovejas al matadero en Girona.

Nun lu garren los taurinos,

nin siquier los cazadores,

nenguna triba malinos,

tampoco, maltratadores.

Nun saben nada les besties

de los otros animales,

¡qué los lleven males güesties!,

¡qué los lleven güesties males!

Nes oveyes y corderos,

nun ven más que son chuletes,

de Piqué, los compañeros,

son tayaes y filetes.

Bendita seya la estampa,

del que quier sin interés,

seyan collacios de campa,

o cuadrúpedu montés.

Escorrió pela autopista

al repunante camión,

pero–yos perdió la pista,

nun llogró la salvación.

Los sos güeyos de tristura,

la so cara de medrana,

una noble creatura

so la condición humana.

Exemplu pal despiadáu,

del home’l meyor amigu,

que se caltién al so llau,

magar produza respigu.

Por una mirada un mundu

(Semeya, Alicia Polledo)

Por una mirada un mundu,

na mirada d’un coríu,

que nun ye tuyu nin míu,

cola muerte nun segundu.

Onde l’home se fai l’amu,

y la sorrisa ye falsa,

lleven l’oru; nun, la balsa,

con cien puestos por reclamu.

El besu, besu de Xudas,

que rutia fueu en bardial,

se quema la castañal,

si nun torgas, ¿lo pescudas?

Muerre coríu y raposu,

el llobu ya’l percuspín,

de nueche, too paxarín,

ya arroxen col mesmu osu.

Esa mirada qu’espeya,

espeya murnia y mugor,

la medrana del horror,

na vida que nun ye bella.

La semeya d’Alicina

nos amuesa la llaceria,

que pinta mui mal la feria,

¡valga Dios y la Santina!

Al mar fuera a por naranxes

y taba contamináu,

como esi ríu d’al llau,

seique como’l mesmu Ganxes.

Tan acabando col mundu,

una montonera fatos,

la mirada de los patos

reflexa’l malinu tundu.

Otru martes d'escorial

El Escorial del revés,

toi sentáu nel otru mundu,

como Felipe II,

al aviesu, ¿nun lu ves?

Nun ye la siella del rei,

ésta ta nel otru andar,

per onde fuera a esguilar,

al nun ser real, ¿acuéi?

Ye namái un mirador,

na ruta del picu Abantos,

al que xubiéramos tantos,

que baxamos pol mugor.

A mio vera’l monasteriu,

un monasteriu imperial,

ésti sí que ye real,

magar qu’un real misteriu.

Ye la octava maraviya,

que festexa San Quintín,

la trespando pel camín,

ensin rustir na parrilla.

Per detrás, La Ferrería,

una viesca con fechizu,

na que nun crez el berizu,

pero brota poesía.

Mientres torgo’l mio llamentu,

voi gastando la mio vida,

pa ganame la comida

y ser a vivir del cuentu.

Fino llantando’l rebite,

asina’l mio mal espanta,

qu’invitáronme a la xanta,

anque pagué yo’l convite.

Asturies arde de nuevu

(Semeya: La voz d'Asturias)

     Como tolos años, Asturies arde. Mientres se crucien acusaciones, se xeneren odios. Los mios parientes de Vi!!auril de Sierra a pocu amburen esta mesma nueche cola so casería y les vaques. Los culpables nun son los ganaderos, son los pirómanos delincuentes que nun respeten nin la vida del vecín. Ente ellos pue haber ganaderos como pue haber de cualesquier otru colectivu interesáu. Tamién lu ye l’Alministración, a la que l’asuntu se–y va de les manes. ¿Cuánta xente va tener que morrer pa que tomen midíes drástiques? Dempués se pondrá la cebada al rau cuando yá nun tea remediu y a los que prinden se–yos xulgará por homicidiu imprudente, como si nun supieren el mal que faen ya’l que puen algamar a faer. Mentanto, tolos paisanos qu’alienden mal aforfuguen por culpa d’un grupu d’egoístes desalmaos y los que viven del turismu ven como’l so pan s’esfuma. Enantes, los nuesos güelos atizaben nel bardial torgando de que nun s’espardiera’l fueu ya'l monte se caltenía llimpiu. Agora, los escelebraos quemen la viesca colos sos animales y plantes al tiempu que vamos afogando toos. Menos “Paraísu Natural” y más arimar el costazu p’acabar con esta cafiante llaceria.

Na viesca La Ferrería

Al xardín La Ferrería

quier la mio ma que yo vaya,

por ver si atopo allegría

nesa viesca guapa a esgaya.

Vamos los dos, los dos, los dos

vamos los dos, en compañía,

pelos caminos de Dios,

al xardín La Ferrería.

Entrugué per una fonte,

nesa fermosa mañana,

quedando ablucáu pol pronte,

pos me retrucó una xana.

Ellí los dos, los dos, los dos,

restallamos d’allegría,

ellí los dos, los dos, los dos,

na viesca La Ferrería.

La xana yera d’Uviéu,

decaté pola armonía,

foi casualidá de mieu,

probe de min, ¿qué sabía?

Falen los dos, los dos, los dos,

falen los dos con allegría,

falen los dos, los dos, los dos,

na viesca La Ferrería.

Magar que nos despidimos,

fuimos coneutar nes muries

del Feisbuc qu’un día abrimos,

son los milagros d’Asturies.

Colen los dos, los dos, los dos,

Pin y Manuel en compañía,

güei vos lu cuenta Pin a vós,

que tornó cola allegría.